SIMIYU WAITIKIA KWA KISHINDO KAMPENI YA RAIS SAMIA HUDUMA YA MSAADA WA KISHERIA, KUTENGA CHUMBA KILA KATA,KIJIJI KWA AJILI YA UTOAJI MSAADA WA KISHERIA BAADA YA KAMPENI, RC SIMIYU ATOA WITO KWA WANANCHI KUTUMIA VYEMA FURSA HIYO.

Posted on: September 18th, 2023

Bariadi,

Mkuu wa Mkoa wa Simiyu Mhe.Dkt. Yahaya Ismail Nawanda amesema Mkoa wa Simiyu umejipanga vyema kuhakikisha kuwa Wananchi hususani wasiokuwa na uwezo  Mkoani humo wanafikiwa na huduma ya msaada wa kisheria.

Dkt.Nawanda ameyasema hayo 18 Septemba 2023 wakati wa uzinduzi wa Kampeni ya utoaji huduma ya  Msaada wa kisheria kwa Wananchi ijulikanayo kama Kampeni ya Mama Samia ya Msaada wa  kisheria,uliofanyika katika eneo la Stendi ya Zamani ya Halmashauri ya Mji wa Bariadi.

Katika kuunga Mkono Kampeni hiyo ya Mama Samia Mkuu wa Mkoa wa Simiyu Dkt Yahaya Nawanda amesema Mkoa utatoa chumba maalumu kwa ajili ya Wataalamu wa Sheria kuhudumia Wananchi katika kila Ofisi za  Kata na Kila kijiji mara baada ya Kampeni ya Mama Samia  lengo likiwa ni kuhakikisha Wananchi wapatao Milioni 2.5 Mkoani Simiyu  wanafikiwa na huduma hiyo muhimu.

"Tutatoa vyumba hivi bure kabisa na naomba nikuthibitishie Mhe.Waziri kuwa  kuwa tumejipanga vyema katika kuhakikisha kuwa malengo mahsusi ya Kampeni ya Mama Samia yanatekelezwa kikamilifu ,kwetu hii ni fursa na naomba nikuhakikishie kuwa tunaenda kuvunja rekodi kwa kuwa na watu wengi zaidi na Simiyu tunakwenda kuwa wa kwanza"Alisema Dkt Nawanda.

Aidha Mkuu wa Mkoa Dkt Nawanda amemhakikishia Waziri wa Sheria na  Katiba kuwa kama Mkoa watatoa ushirikiano  mkubwa kwa Maafisa  wote watakaoshiriki katika kampeni hiyo muhimu ili kufikia  lengo la  kuwafikia watu wengi zaidi Vijijini.

Amesema kuwa Mhe Rais ametoa huduma hiyo bure  hivyo Wananchi wote  wenye changamoto za kisheria mirathi,kijinsia na migogoro ya ardhi pamoja na matatizo ya mikataba  kutumia hiyo fursa kwenda kupata huduma bure"alisisitiza Mkuu wa Mkoa Dkt Nawanda.

GCO,

Simiyu RS

18 Septemba 2023.